Strwythur y Grŵp

Ceir dau is-gwmni o fewn y Grŵp, sef Gofal a Thrwsio Gwynedd (J125) a Gofal a Thrwsio Môn (J134). Mae’r ddau yn gwmnïau cyfyngedig gan warant ac yn elusennau cofrestredig. Mae gan yr is-gwmnïau annibyniaeth gweithredol trwy eu Pwyllgorau Rheoli, sy’n cynnwys cynrychiolwyr y Gymdeithas ac asiantaethau eraill gyda diddordeb arbennig yn y grwpiau cleient a wasanaethir. Rhaid i’r ddau is-gwmni dderbyn cymeradwyaeth Bwrdd Rheoli’r Gymdeithas yn flynyddol i’w Cynllun Busnes a Chyllideb. Mae Memorandwm ac Erthyglau’r cwmnïau yn sicrhau rheolaeth y Gymdeithas trwy gyfrwng y mwyafrif o bleidleisiau mewn cyfarfodydd cyffredinol. Atgyfnerthir rheolaeth y Gymdeithas gan gytundeb gweithdrefnau grŵp, sydd hefyd yn ein hymrwymo i ddarparu gwasanaethau corfforaethol i’r ddau is-gwmni. Ymhlith y gwasanaethau hyn y mae paratoi cyfrifon rheoli, archwilio mewnol, cefnogaeth Technoleg Gwybodaeth a Chyfathrebu, cefnogaeth adnoddau dynol a’r swyddogaethau ysgrifennydd cwmni.

Bydd trydydd is-gwmni, Gorwel Cyf, yn dechrau gweithredu yn 2007/08. Cafodd y cwmni hwn ei gofrestru eisoes gyda Thŷ’r Cwmnïau ac mae cais i’w gofrestru fel elusen yn derbyn sylw'r Comisiwn Elusennau. Byddwn hefyd yn cyflwyno cais i’w gofrestru fel Landlord Cymdeithasol Cofrestredig. Bydd Gorwel Cyf yn rheoli prosiectau tai a fydd yn darparu cefnogaeth i ferched sy’n dioddef trais yn y cartref yn Ynys Môn a chefnogaeth i bobl ddigartref ym Mhwllheli. Cymdeithas Tai Eryri yw unig aelod y cwmni a’r Gymdeithas sy’n gyfrifol am benodi aelodau’r Pwyllgor Rheoli.